XORÁL (lat. cantus choralis – xorla nәğmә oxuma) – dini nәğmә növü. Roma katolik kilsәlәrindә latın dilindә oxunan Qriqori X.-ı vә Almaniyada protestant kilsәsi islahatından sonra alman dilindә oxunan protestant X.-ı mövcuddur. Qriqori X.-ının müxtәlif vә rәngarәng repertuarı, әsasәn, Karolinqlәr dövründә formalaşmışdır (ilk notlaşdırılmış әlyazmaları 9 әsrә aiddir), mәtnlәrin çoxu Müqәddәs Kitabdan götürülmüşdür. Yeni dövrdә xüsusilә populyar oxumalardan ibadәtdәn kәnarda istifadә edilir.
Protestant X.-ı ibadәtdә birsәsli xorla ifa olunan kilsә mahnısıdır, hәmçinin onun çoxsәsli (bir qayda olaraq, 4 sәsli) monoritmik işlәmәsidir. Bunların әn mәşhurları İ.S.Baxın yaradıcılığında әks olunmuşdur.
