XORAOTU (Anthyllis) – paxlakimilәr fәsilәsindәn bitki cinsi. Mürәkkәb tәklәlәkvari yarpaqları olan otlar, yarımkollar vә kollardır. Çiçәklәri kәpәnәkşәkilli sarı, narıncı, bәzәn qırmızı, çiçәkyanlıqları vә üçdilimli örtücü yarpaqlarla әhatәlәnmiş tәpә vә sıx qoltuq başcıq çiçәk qrupunda toplanmışdır. Boruşәkilli kasacığı sıx tükcüklәnmiş, çiçәklәdikdәn sonra zәif şişkinlәşmiş olur. Meyvәlәri birtoxumlu, yumurtavari, kasacığa toplanmış, açılmayan paxladır. Avropa, Şimali Afrika vә Kiçik Asiyanın mülayim vә subtropik vil.-lәrindә, әn çox Aralıq dәnizi ölkәlәrindә tәqr. 60 növü yayılmışdır. Rusiyanın Avropa hissәsindә, Qafqazda vә Krımda tәqr. 10 növü mәlumdur. Ən çox yayılanlar yarasağaldan, yaxud sarı dovşan üçyarpaq yoncası (A.vulneraria), iribaş X. (A. macrocephala) növlәridir. Azәrb.-da 2 növü: Qafqaz X. (A. caucasica) vә tüklü X. (A. lachnophora) bitir. X. antiseptik, yarasağaldan, antitoksik vә b. tәsirlәrә malikdir. Yaxşı yem bitkisidir (südartırandır). X.-nun dekorativ növlәri dә vardır: Cәnubi Avropa kolları olan yonca X. (A. cytisoides), dağ X. (A. montana), Yupiterin saqqalı X. (A. barbara-jovis).
Dağ xoraotu (Anthyllis montana).
