XORASANİ Axund Molla Mәhәmmәd Kazim (1839, İran, Mәşhәd – 1911, İraq, Nәcәf) – İran ilahiyyatçısı. İlk tәhsilini Mәşhәddә almışdır. Tәhsilini davam etdirmәk üçün Nәcәfә gedәrkәn bir müddәt Sәbzәvarda qalmış, Hadi Sәbzәvarinin fәlsәfә dәrslәrindә iştirak etmişdir. Nәcәfdә Mürtәza Ənsaridәn dәrs almışdır. Müәllimi Mirzә Şirazinin vәfatından sonra mәrcә әttәqlid olmuşdur. Ən mәşhur tәlәbәlәri Hüseyn Badkubeyi, Mәhәmmәd Hüseyn Naxçıvani, Ağahüseyn Burucerdi, Hairi Yәzdi, Mәhәmmәdhüseyn Nainidir.
X. İran inqilabını (1905–11) ciddi şәkildә dәstәklәmişdir. Konstitusiyanın şәriәt normalarına uyğunluğuna tәkid etmiş, lakin dini hakimiyyәtin qurulmasını vacib saymamışdır. İranın siyasi hәyatında rol oynamışdır. 1911 ildә ölkәdәki rus vә ingilis qüvvәlәrinә qarşı elan etdiyi cihad qәfil ölümü sәbәbindәn yarımçıq qalmışdır.
Fiqhә dair bir sıra әsәrin, o cümlәdәn “Kifayәtül-üsul”un (“Üsula dair kifayәtedici әsәr”) müәllifidir.
