XOTÁN – Şimal-Qәrbi Çindә, Sintszyan-Uyğur muxtar r-nunda şәhәr. Əh. 408 min (2018). Yurunqqaş çayı (Xotan çayını yaradan qollardan biri; Tarim çayı hövzәsi) sahilindәdir. Şimali Kunlun avtomobil yolunda nәql. mәntәqәsi.
İpәk yolunun üzәrindә yerlәşmәsi şәhәrin iqtisadi inkişafına tәkan vermişdir. X. ölkәnin әsas ipәk istehsalı (mindәn çox işçi çalışır, ildә tәqr. 150 mln. m ipәk; “Hotan Silk Factory” әn iri istehsalçıdır) vә ixracatı mәrkәzidir. Toxuculuq (zәrif yun, ipәk, kәtan iplik, atlaz parça), xalçaçılıq, zәrgәrlik mәmulatları, hazır geyim istehsalı vә ticarәti, turizm inkişaf etmişdir. X. Şәrqi Asiyanın әsas nefrit mәnbәyidir. Maşınqayırma sәnayesi metal konstruksiya, hesablayıcı cihaz vә dәzgah istehsalı üzrә ixtisaslaşmışdır. K.t.-nda әkinçilik (qarğıdalı, buğda, çәltik, darı, pambıq), üzümçülük vә baramaçılıq mühüm yer tutur. Kustar istehsal (keçә mәmulatlar, çәtir, zinyәt әşyaları, ağac üzәrindә oyma, bәdii parça) var. Nәql. infrastrukturu inkişaf etmişdir.
