XRAMULYALAR (Capoeta) – çәkikimilәr fәsilәsinin şirin sularda yaşayan balıq cinsi. Uz. 60 sm-ә, kütlәsi 2 kq-a qәdәr çata bilir. 25-dәn artıq növü Afrikanın, Kiçik Asiyanın, Cәnubi Qafqazın, Suriyanın, İranın, Türk.-ın, Şimali Hindistanın, Cәnubi Çinin su hövzәlәrindә yayılmışdır. Azәrb.-da 2 növü yaşayır: Kür xramulyası (C. capoeta) Kür vә Arazda, onlara tökülәn çaylarda, Pirsaatçayda, Lәnkәran xramulyası (C. gracilis) isә Azәrb.-ın c.-ş. hissәsinin su hövzәlәrindә yayılmışdır. X. әsasәn detrit vә bitki qalıqları ilә qidalanırlar, alt dodağının bәrk, bağırsağının isә bәdәndәn 5–6 dәfә uzun olması bu cür qidalanmaya uyğunlaşmadır. Qış aylarında passiv hәyat tәrzi keçirir, su hövzәsinin dәrin hissәlәrindә vә ya iri daşların altında olan çuxurlarda toplaşırlar. Əmtәә keyfiyyәtlәri yaxşıdır, lakin azsaylı olduqlarından vәtәgә әhәmiyyәtinә malik deyildir, hәvәskar balıqçılar tәrәfindәn ovlanılır.
Kür xramulyası (Capoeta capoeta).
