XRELƏR, t ә m r e, t a ç ö m – Vyetnamın c.-unda (Nqiabin әyalәtindә) xalq. Sayları 113 min nәfәrdir (1999). Dillәri monkhmer qrupuna aiddir. X. tyamların tәsirinә mәruz qalmışlar. Yazı sistemi 20 әsrin әvvәllәrindәn latın qrafikası әsasındadır. Vyetnam dili yayılmaqdadır. Ənәnәvi inanclarını – animizmi, aqrar kultunu qoruyub saxlamışlar.
Əsas әnәnәvi mәşğuliyyәtlәri talalarda toxa vә xış әkinçiliyi (çәltik, qarğıdalı, kökü meyvәlilәr vә s.), heyvandarlıq (qaramal), ovçuluq, balıqçılıq, yığıcılıqdır. Sәnәtkarlıq sahәlәrindәn hörmә, toxuculuq inkişaf etmişdir. Ənәnәvi sosial tәşkilatları kәnd icmasıdır (pley). Düzbucaqlı yaşayış evlәri dirәklidir, damları qoşaçatılıdır. Ailә kiçikdir, böyük ailәnin qalıqları saxlanılır. Qohumlar arasında beşinci nәslә qәdәr nikaha girmәk qadağandır. Ənәnәvi kişi geyimi: bel sarğısı, köynәk, baş sarğısı; qadınlarda – iki kәsik parçadan tikişsiz uzun әtәk, kofta, döşlük, baş sarğısı; әnәnәvi vyet paltarı (ao zay) yayılmışdır. Kişilәr vә qadınlar gümüş vә bürüncdәn çoxlu bәzәk gәzdirirlәr. X. әvvәllәr saçlarını peysәrdә yığır, daraq, yaxud sancaqla bağlayırdılar. Dişlәrin mişarlanması, yuxarı dişlәrdәn altısının çıxarılması adәtlәri mövcuddur. Nәğmә vә musiqi folkloru zәngindir, nağıllar vә rәvayәtlәr qorunub saxlanılır.
