XRİSTİAN SİNDİKALİZMİ – 19 әsrin sonu – 20 әsrdә Qәrbi Avropa hәmkarlar ittifaqları hәrәkatında cәrәyan. İdeoloji cәhәtdәn Roma-katolik kilsәsi ilә әlaqәli idi vә Roma papası XIII Levin fәhlәlәrin vәziyyәtinә hәsr olunan vә katolik kilsәsinin sosial doktrinasının әsaslarını ifadә edәn “Rerum novarum” ensiklikasına (1891) әsaslanırdı. Cәrәyan Fransada (1885–87), Belçikada (1886), Hollandiyada (1889) xristian sindikatlarının (hәmkarlar ittifaqlarının) meydana gәlmәsi ilә әlaqәdar belә adlanmışdır.
1904 ildә Fransada X.s. tәrәfdarlarının 1-ci qurultayı, 1920 ildә Haaqada tәsis konfransı keçirilmişdir. Konfransda Beynәlxalq xristian hәmkarlar ittifaqları konfederasiyası (fr. Confèdèration internationale des syndicats chrètiens, CISC) yaradıldı. Avstriya, Belçika, Macarıstan, Almaniya, İspaniya, İtaliya, Niderland, Fransa, Çexoslavakiya, İsveçrә nümayәndәlәri CISC-in üzvlәri oldular. İkinci dünya müharibәsindәn (1939–45) sonra X.s. Latın Amerikasının, Afrikanın vә Asiyanın inkişaf etmәkdә olan ölkәlәrindә yayıldı (Latın Amerikası xristian hәmkarlar ittifaqları konfederasiyası, 1954; Afrika hәmkarlar ittifaqları birliyi tәşkilatı, 1959; Asiya hәmkarlar ittifaqları qardaşlığı, 1963). 1968 ildә CISC әsasında Ümumdünya Əmәk Konfederasiyası (ing. World Confederation of Labour, WCL) yaradıldı.
