XRİSTİAN-DEMOKRAT ÇAĞIRIŞI (XDÇ; niderlandca Christen-Democratisch Appél, CDA) – Niderlandın mәrkәzçi siyasi partiyası. 1976 ildә üç klerikal partiya – Əksinqilabi partiya, Katolik xalq partiyası vә Xristian-tarixi ittifaqın yaratdığı Xristian-demokrat çağırışı siyasi blokundan formalaşmışdır. Partiya rәsmәn 11.10.1980 ildә elan edilmişdir, tәrkibinә daxil olan partiyalar buraxılmışdır. Burjuaziyanın müxtәlif tәbәqәlәri, iri sәnayeçilәr vә torpaq sahibkarlarının bir hissәsi, klerikal dairәlәr, ziyalı tәbәqәsinin imtiyazlı hissәsi vә dövlәt mәmurlarının ali tәbәqәsi XDÇ-nin sosial bazasını tәşkil edir. Partiya dini prinsiplәrә әsaslanır, әnәnәvi dәyәrlәr vә qayda-qanun sistemini müdafiә edir, radikal islahatlara vә ekstremizmә mәnfi münasibәr bәslәyir. Xarici siyasәtdә tәhlükәsizliyin möhkәmlәndirilmәsinә çağırır, әnәnәvi müttәfiqlәrini dәstәklәyir, mötәdil proteksionizm mövqeyindә durur. Gәnclәr vә qadın tәşkilatlarına, mәtbuat orqanlarına malikdir, Avropa xalq partiyası vә Avropa xristian demokratları ittifaqına daxildir, Xristian-demokrat internasionalının üzvüdür. 56,3 min (2014) üzvü var.
1994 ilәdәk XDÇ lider mövqelәrdә duraraq, bütün hökumәt koalisiyalarının iş tirakçısı olmuş, sonralar öz yerini Əmәk partiyasına versә dә, 21 әsrin әvvәllәrindә yenidәn hökumәt koalisiyasına rәhbәrlik etmişdir. XDÇ tәsis edildiyi vaxtdan fәaliyyәt göstәrmiş 14 hökumәt kabinetindәn 11-nә daxil olmuş, liderlәri 10 kabinetә başçılıq etmişlәr. 2012 il seçkilәrinin nәticәlәrinә görә, sәslәrin 8,5%-ni toplayaraq, müxalifәt partiyası mövqeyinә keçmişdir.
