XRİSTOV Boris (18.5.1914, Plovdiv – 28.6.1993, Roma; Sofiyada dәfn edilmişdir) – bolqar müğәnnisi (bas). Bolqarıstan Xalq Resp. xalq artisti (1975). 20 әsrin 2-ci yarısının әn parlaq bas sәslәrindәn biri olmuşdur. Sofiyadakı Aleksandr Nevski kafedral kilsәsinin xorunda, 1930 ildәn “Qusla” kişi xorunda oxumuşdur; müntәzәm musiqi tәhsili almamışdır. 1942–45 illәrdә (fasilәlәrlә) Romada R.Straççaridәn dәrslәr almışdır. Opera sәhnәsindә debütü 1946 ildә Reco-di-Kalabriya teatrında (C.Puççininin “Bohema” operasında Kollenin partiyası) olmuşdur. Dünyanın aparıcı teatrlarında oxumuşdur: “La-Skala” (Milan; 1947 ildәn), “Kovent-Qarden” (London; 1949 ildәn), Paris Operası (1953 ildәn), “Kolon” (Buenos-Ayres; 1956), San-Fransisko Operası (1956; ABŞ-da debüt), Çikaqo Lirik Operası (1957 ildәn), Vyana Dövlәt Operası (1962 ildәn). Zalsburq (1949, 1960), Lütsern (1949) vә s. beynәlxalq musiqi festivallarının iştirakçısı olmuşdur. Dünyanın nüfuzlu konsert sәhnәlәrindә çıxış etmişdir (“Muzik ferayn”, Vyana, 1944, Albert-holl, 1952 ildәn; “Konsertgebau”, 1956; Karnegi-holl, 1958 ildәn; Yelisey Çöllәri Teatrı, Paris, 1966 vә s.; son konserti 1986 ildә Romada baş tutmuşdur. Boris, Dosifey (“Boris Qodunov”, “Xovanşina”, M.P.Musorqski), II Filip (“Don Karlos”, C.Verdi) vә Mefistofelin (“Faust”, Ş.Quno) partiyaları әn böyük yaradıcılıq uğurudur.
