XULUFLU Vәli Mәmmәdhüseyn oğlu (26.5.1894, indiki Şәmkir r-nunun Xuluflu k. – 13.10.1937, Bakı) – Azәrb. folklorçusu, tarixçi, prof. (1931). 1917 ildә Gәncәdә müәllimlәr kursunu bitirdikdәn sonra müәllimlik etmişdir. 1920 ildә AK(b)P-nin 1-ci qurultayının nümayәndәsi olmuş, partiyanın Gәncә qәza komitәsindә işlәmişdir. 1921 ildә partiya sıralarında tәmizlәnmә işi ilә әlaqәdar partiya üzvlüyündәn çıxarılmış, 1927 ildә yenidәn qәbul edilmişdir. 1922–29 illәrdә Ümumittifaq Yeni Türk Əlifbası Komitәsinin tәlimatçısı, “Bakinski raboçi” nәşriyyatının vә “Azәrnәşr”in redaktoru, 1929–36 illәrdә Azәrb. Dövlәt Elmi Tәdqiqat İn-tunun elmi katibi, Dil, әdәbiyyat vә incәsәnәt bölmәsinin direktoru, Azәrb. SSR Mәrkәzi Dövlәt Arxivinin müdiri, SSRİ EA Azәrb. filialı Tarix İn-tunun direktor müavini vә s. vәzifәlәrdә çalışmışdır. Azәrb.SSR MİK-in üzvü olmuşdur. Azәrb.-ın orta әsrlәr tarixinә dair bir sıra әsәrlәrin (“Sәlcuq dövlәtinin daxili quruluşuna dair”, B., 1930) müәllifidir. Azәrb. şifahi xalq әdәbiyyatı nümunәlәrinin toplanması vә nәşri sahәsindәdә fәaliyyәt göstәrmişdir. 1927 ildә Aşıq Hüseyn Bozalqanlının dilindәn “Koroğlu” dastanının iki qolunu yazıya almış vә kitab halında dәrc etdirmişdir. “El aşıqları” (1927), “Tapmacalar” (1928) kitablarının tәrtibçisidir. Bakıda vә Gәncәdә adına küçә var.
