İBRAHİM BALABAN (1921, Bursa, Seçköy k. – 9.6.2019, Güngörәn, İstanbul) – türk boyakarı, qrafik vә yazıçı. Xüsusi rәssamlıq tәhsili almamışdır. Bursa hәbsxanasına salınmış (1937–50, fasilәlәrlә), burada Nazim Hikmәtlә tanış olmuşdur. N.Hik mәtlә birlikdә hәbsdә keçirdiyi yeddi ili sonradan “Şair ata ve damdakılar” (1968) xatirә-romanında qәlәmә almışdır. İlk sәrgisi 1953 ildә İstanbulda açılmışdır. 1961 ildә burada realist rәssamlardan ibarәt “Yeni şaxә” qrupunu yaratmışdır. İki minә yaxın tablonun müәllifi olan İ.B.-ın
Türkiyә vә digәr ölkәlәrdә 50-dәn çox sәrgisi keçirilmişdir. İ.B.-ın әsәrlәrindә insanların gündәlik hәyatı vә mәişәti, türk kәndinin sosial ziddiyyәtlәri tәsvir olunur. Əsәrlәri: “Hәbsxana qapısında”, “Doğum”, “Kәndli toyu”, “Palçıqtutanlar”, “Şumlama”, “Biçinçilәr”, “Xırman”, “Dağlarda üç qadın”, “27 may 1960-cı il”, “Araba”, “Ocaq başında”, “Köc”, “Sәbәt daşıyan qadın”, “Sәrxoşlar”, “Atatürk”, “Bursa”, “Türkiyә“, “Ata”, “Nazim Hikmәt” vә s. 1978 ildә Bakıda keçirilmiş “Müasir türk boyakarlığı” sәrgisindә İ.B.-ın “Biçinçilәr” (1973) tablosu nümayiş etdirilmişdir. “Balaban” (1962), “İz” (1965), “Dağda mәhkәmә” (1990), “Qәlibәsığmayanlar” (1997), “Nazim Hikmәt vә biz” (1998), ”Avropada dolaşanlar” (1999), “Nazım Hikmәtlә yeddi il” (2003) vә s. kitabların müәllifidir. “Qaçqın” filmindә Bülbül xoca roluna çәkilmişdir (2008; rej. R.Çelik). Oğlu Hәsәn Nazim Balaban tanınmış rәssamdır.
İbrahim Balaban. “Doğum” (1950). Galeri Soyut (Çayyolu), Ankara.
