İBRAHİM ÖRS (1946, Tәrcan ilçәsi, Ərzincan – 6.7.2022, Kopenhagen; Bodrumda dәfn edilmişdir) – türk rәssamı. İstanbul Dövlәt Gözәl Sәnәtlәr Akademiyasını bitirmişdir (1971; 1972–85 illәrdә burada dәrs demişdir). 1971–72 illәrdә Kopenhagen Kral Akademiyasında qravüra sahәsindә çalışmış, ilk fәrdi sәrgisi İsveçdә nümayiş olunmuşdur. Böyük ölçülü divar rәsmlәri, relyef vә Bizans mozaikası tәrzindә әsәrlәri ilә tanınmışdır. Yaradıcılığına türk mәdәniyyәti vә klassik Avropa incәsәnәtinin, xüsusilә barokko üslubunun tәsiri olmuşdur. “Burak”, “At üstündә”, “Sehrli” vә s. mifoloji süjetli әsәrlәri ilә yanaşı, bәzi әsәrlәrindә rәsmә yazılar vә xәttatlıq kodları әlavә etmişdir. Fiqurativ boyakarlıq üslubunda çalışan rәssam sistematik deformasiya texnikasından bәhrәlәnmişdir. İ.Ö.-ә görә, rәsm kontrastlar oyunudur, bir rәsmdә nә qәdәr kontrast varsa, bir o qәdәr dә rәsm zәnginlәşir. “Qol gülәşi” (2011), “At” (2013), “Buğa” (2014), “Qucaqlaşma” (2015), “Maskalı qadın” (2018), “Ağac altında yatan mavi geyimli qadın” (2018), “Natürmort” (2019) vә s. әsәrlәrin müәllifidir. 50-dәn çox fәrdi sәrgisi keçirilmişdir. Əsәrlәri bir çox muzey vә şәxsi kolleksiyalarda saxlanılır.
İbrahim Örs. “Ah mәnim sevgim”. 2019.
Nurol Sәnәt Qalereyas. Ankara.
