İBRAHİMOV Lekim Hakimoviç (d.21.12.1944, Qazax. SSR, Alma-ata vil., Uyğur r-nunun Kiçik Dehan k.) – uyğur әsilli özbәk qrafiki, rәssam. Özb. Resp. xalq rәssamı (2001). Özb. Resp. Rәssamlıq Akademiyasının akad.-i (1999), K.Behzad ad. Milli İncәsәnәt vә Dizayn İn-tunun prof.-u (1999). Alma-ata Rәssamlıq Mәktәbini (1971), Daşkәnd Teatr vә İncәsәnәt İn-tunu (1977) bitirmişdir. 1978–86 illәrdә rәssamların “Sinej” yaradıcılıq evi emalatxanasına vә Baltikayanı ölkәlәrin studiyalarında çalışmışdır. İ.-un yaradıcılığında Şәrq vә Qәrb mәdәni irsi, modernizm vә poetik simvolizm, әnәnәvi klassik vә abstrakt-sürrealist cәrәyanlar harmonik şәkildә birlәşir, boyakarlıq, qrafika vә xәttatlıq birbirini tamamlayır. İ.-un “Min bir gecә” nağılları әsasında yaratdığı “Min mәlәk vә bir tablo” adlı kәtan üzәrindә art-layihәsi (2010–2012) 1000 ayrı-ayrı rәsmdәn (bütövlükdә әsәrin hünd. 8 m., uz. 66 m, sah. 500 m2-dәn çoxdur) ibarәtdir; tәqdimatı Praqa (2012), Moskva (2013) vә Daşkәnd (2014) şәhәrlәrindә keçirilmişdir. Moskvadakı tәqdimatda iştirak etmiş beynәlxalq “İnterrekord” agentliyi iki nominasiyada dünya rekordunu qeydә almışdır: “Bir rәssam tәrәfindәn kәtan üzәrindә yağlı boya ilә çәkilmiş әn böyük tablo vә “Bir tabloda әn çox sayda mәlәklәr.” Digәr әsәrlәri: “Bibixanım” (1998), “Asiya okeanı” (1999), “İmperatriçә”, “Görüş”, “Güllәrin ahәngi” (hәr üçü 2000), “Turfan qadınları”, “Kurmanqazı melodiyası” (hәr ikisi 2003), “Şәrq şahzadәsi”, “Asiyanın qaçırılması”, “Hukusay vә Fudziyama” (hәr üçü 2004), “Ərәb atının qәzәbi”, “Qara vә ağ, mustanqların dastanı” (hәr ikisi 2005), “Yuxu” (2008), “Sırdәrya” (2010), “Vaki it ilә” (2015) vә s. Əsәrlәri Dövlәt Şәrq İncәsәnәti Muzeyindә (Moskva), Özb. Dövlәt İncәsәnәt Muzeyindә (Daşkәnd), Budapeşt Şәrqi Asiya Muzeyindә vә s. nümayiş olunur, ABŞ, Fransa, İtaliya, Yaponiya, Almaniya vә s. ölkәlәrdәki şәxsi kolleksiyalarda saxlanılır. İ.-un fәlsәfi düşüncәlәrini әks etdirәn şeirlәrindәn ibarәt “Mәnim vәhyim” adlı albomu (1997) var. “Dünya mәdәniyyәtinin inkişafına verdiyi töhfәyә görә” Özb. Rәssamlıq Akademiyasının qızıl medalına layiq görülmüşdür (1998). Moskvada Z.Sereteli İncәsәnәt Qalereyasında Ç.Aytmatovun xatirәsinә “Asiyanın qaçırılması” adlı fәrdi sәrgisi keçirilmişdir (2008).
İbrahimov L.H. “Kurmanqazı melodiyası”. 2003.
