İBRAHİMOV Rasim Sәxavәt oğlu (18.4.1962, Bakı – 26.6.1992, Xocavәnd r-nunun Tuğ k.; Bakıda Şәhidlәr Xiyabanında dәfn olunmuşdur) – Azәrb.-ın Milli Qәhrәmanı (ölümündәn sonra, 16.9.1994). C.Naxçıvanski ad. Hәrbi Mәktәbi (1979), Bakı Ali Ümumqoşun Komandirlәr Mәktәbini (1983) bitirmişdir. Motoatıcı tağım komandiri müavini kimi Almaniyada hәrbi xidmәtdә olmuşdur. 1988 ildә Azәrb.-a qayıtmış, bir müddәt Respublika Hәrbi Komissarlığında çalışdıqdan sonra Ağsu r-nu hәr bi komissarının müavini tәyin edilmişdir. Baş Qәrargahın Saratov ş.-ndәki 3 aylıq kursunu bitirmiş, Füzuli r-nunda hәrbi komissarın müavini olmuşdur. Ermәni silahlı dәstәlәrinin Azәrb. kәndlәrinә hücumları başlayarkәn Füzuli r-nunda könüllü özünümüdafiә taboru yaratmış, onun komandiri olmuşdur. Döyüşlәrdә göstәrdiyi şücaәtә görә İ.-a mayor rütbәsi verilmişdir. İ.-un taboru Tuğ k. uğrunda gedәn döyüşdә düşmәnә ağır zәrbә vurmuş, onun dayaq nöqtәsini әlә keçirmişdi. Döyüşdә İ. ayağından yaralanmış, düşmәnә әsir düşmәmәk üçün әlindәki qumbaranı partlatmışdır. Tәhsil aldığı 131 saylı orta mәktәb onun adını daşıyır. Çilov a.-nda abidәsi ucaldılmış, xatirә bağı salınmışdır.
