İDMAN GİMNASTİKASI – idman növü; gimnastika alәtlәrindә, sәrbәst hәrәkәtlәr üzrә vә tәkanla tullanma yarışlarını birlәşdirir. Gimnastika çoxnövçülüyü üzrә böyük beynәlxalq turnirlәrin müasir proqramlarına qadınlar üçün müxtәlif hündürlüklü bruslarda, tirlәrdә, tәkanla tullanmada, sәrbәst hәrәkәtlәrdә; kişilәr üçün sәrbәst hәrәkәtlәrdә tәkanla tullanmada, atda (gimnastik alәt), halqalarda, paralel bruslar vә tirlәrdә mütlәq vә sәrbәst hәrәkәtlәr daxildir. Mütlәq vә sәrbәst proqramların icrasından sonra çoxnövçülük üzrә komanda birinciliyinin qalibi müәyyәn edilir; finallarda iştirak etmәk üçün (şәxsi birincilik) 6 nәfәrdәn 36 nәfәrәdәk әn yaxşı çox növçü vә hәr bir proqram növündә 6–8 әn yaxşı idmançı seçilir. Mütlәq hәrәkәtlәr Beynәlxalq Gimnastika Federasiyası (FİJ) tәrәfindәn müәyyәn edilir, sәrbәst hәrәkәtlәr isә onların çәtinliyinә vә kompozisiyasına rәsmi tәlәblәr nәzәrә alınmaqla idmançılar tәrәfindәn tәrtib olunur. Hәrәkәtlәrin icrası 10 ballıq sistem üzrә qiymәtlәndirilir. 19 әsrin 2-ci yarısında Qәrbi Avropanın bir sıra ölkәsindә gimnastika hәrәkәtlәrinin bәzi növlәri üzrә yarışlar keçirilmәyә başlanmışdı.1881 ildә Beynәlxalq Gimnastika Federasiyası (FİJ) yaradılmışdır; 142 ölkәnin milli federasiyası birlәşdirir (2016). 1896 ildә İ.g. Olimpiya Oyunlarının proqramına daxil edilmişdir, 1928 ildәn Olimpiya Oyunların da qadınlar iştirak edirlәr. 1903 ildәn dünya çempionatları keçirilir (1913 ilә qәdәr 2 ildә 1 dәfә, 1922–78 ildә 4 ildә bir dәfә, 1979–91 ildә 2 ildә bir dәfә, 1992 ildәn – hәr il); 1934 ildәn dünya çempionatlarında qadınlarda iştirak edir.
Azәrb.-da İ.g. üzrә ilk çempionat 1939 ildә tәşkil olunmuşdur. Azәrb. Gimnastika Federasiyası (AGF) 1956 ildә Bakıda yaradılmış, 1992 ildә yenidәn tәsis edilmişdir.
