İKİQAT ELEKTRİK TƏBƏQƏSİ – iki fazanın toxunma sәrhәdi boyunca paylanmış әksişarәli elektrik yüklәri toplusu. İ.e.t.-nin yaranmasında elektronlar, ionlar vә istiqamәtlәnmiş polyar (mәxsusi dipol momentinә malik olan) molekullar iştirak edә bilәr. İ.e.t. metalı elektrolitә, mәs., sinki sulfat turşusuna daxil etdikdә әmәlә gәlir. Bu zaman sink elektrolitә müsbәt yüklü ionları verir vә özü mәnfi yüklәnir. Elektrolitin müsbәt yüklәnmiş ionları metalın sәthinә doğru cәzb olunur vә fazaların toxunma sәthi boyunca İ.e.t. yaranır. Yüklәnmiş tәbәqәlәr arasında әmәlә gәlәn elektrik sahәsi sinkin hәll olmasına mane olur, müәyyәn qiymәtdә isә onu tamamilә dayandırır. Elektrod – elektrolit sәrhәdindә potensialın sıçrayışı baş verir.
Bütövlükdә İ.e.t. elektrikә görә neytraldır, tәbәqәnin daxilindә isә elektrik sahәsinin intensivliyi böyük qiymәtlәr ala bilәr. Yüklәnmiş sәthlәrin böyük ölçülәrinә vә aralarındakı mәsafәnin kiçikliyinә görә İ.e.t. böyük elektrik tutumuna malikdir. İ.e.t. elektrokinetik hadisәlәri şәrtlәndirir, elektrokimyәvi reaksiyalar, elektroliz vә s. üçün әhәmiyyәtlidir.
