İKONOQRÁFİYA (yun. εἰκὡν – tәsvir, obraz +...qrafiya) – 1) t ә s v i r i s ә n ә t d ә hәr hansı personajın, әşyanın vә ya süjet sәhnәsinin qәbul edilmiş tәsvir sistemi. İ. qәdimdә sәnәtin dini sitayiş vә mәrasimlәrlә bağlılığından yaranmışdır. İ. sxemlәrinin çoxu sәnәtin dünyәvilәşmәsi vә inkişafı ilә vaxtaşırı dәyişmiş, yenilәri meydana gәlmişdir. Mәdәni vә tarixi proseslәri әks etdirәn İ. yalnız süjet xәtti ilә deyil, hәm dә müәyyәn dövrün xarakterik obrazları, üslubu vә poetikası ilә ayrılmaz şәkildә bağlıdır.
2) S ә n ә t ş ü n a s l ı q d a tәsviri sәnәtin mәnaca tәhlil metodlarından biri. İkonoqrafik tәhlilin әsas mәqsәdi hәr hansı personajın (hәm real, hәm dә әsatiri), süjet sәhnәsinin vә s.-nin tәsvirindә qәbul edilmiş tipoloji әlamәtlәrin vә sxemlәrin tәsnifi vә sistemlәşdirilmәsidir. 19 әsrin ortalarında orta әsrlәr incәsәnәtinin öyrәnilmәsi ilә әlaqәli inkişaf etmişdir. İ.üzrә lüğәtlәrin vә mәcmuәlәrin nәşri abidәlәrin müqayisәli öyrәnilmәsi imkanlarını genişlәndirmişdi. Müasir ikonoqrafik tәdqiqatlar dinlәrin tarix, әdәbiyyatşünaslıq, psixologiya, antropologiya, semiologiya kimi humanitar elmlәrә münasibәti aspektindә aparılır. 20 әsrdә tarixi İ. prinsiplәri foto vә kinosәnәdlәrә dә aid edilir.
